Ундун баасын жогорулатып саткандарга карата тийиштүү чара көрүлүүдө

Ош облусунун Кара-Суу жана Ноокат райондорунда ундун баасын негизсиз жогорулаткан жарандар аныкталды. Бул тууралуу Ош ОИИБинин басма сөз кызматынан билдиришти.

"2020-жылдын 14-март күнү Ош облусунун Кара-Суу жана Ноокат райондорунун айрым айылдарында ундун баасын негизсиз жогорулатып сатып, жашоочулардын нааразычылыгын туудуруп элди дүрбөлөӊгө салган. Кара-Суу районунун Кызыл-Кыштак айыл аймагында азык-түлүк сатуучу дүкөндүн ээси 1973-жылы туулган С.Ш. 14-март күнү 19:30 чамасында кампасында сакталып турган 400 кап унду алып келип, 1-сорттогу ундун кабын 1600 сомдон, ал эми жогорку сорттогу ундун кабын 2000 сомдон саткан. Ошол эле айылдын тургуну 1966-жылы туулган С.Б. 100 кап 1-сорттогу ундун кабын 1650 сомдон саткан. Ноокат районунун Зулпуев айыл аймагынын жашоочусу 1990-жылы туулган С.Р. 14-март күнү саат 19:30 чамасында 100 каптан ашуун ундун кабын 1680 сомдон саткан. Ноокат районунун Ноокат шаарынын тургуну 1968-жылы туулган К.И. ушул эле күнү 200 каптан ашуун 1-сорттогу ундун кабын 1650 сомдон саткан. Жогоруда аты аталган жарандарды текшерген учурда сатылган ундарга тийиштүү эч кандай документтерин көрсөтө алган эмес, ошондой эле ун сатылган дүкөндөрдө контролдук-кассалык машиналарды колдонуусуз акчалай эсептешүүлөрдү жүзөгө ашырган. Бул жагдайлар Кара-Суу жана Ноокат райондук ички иштер бөлүмдөрүнүн маалыматтардын электрондук журналына катталып, текшерүү иштери жүргүзүлүүдө", - деп жазылат маалыматта.