Мухаммедкалый Абылгазиев: "Коронавирустун кесепетинен ата мекендик экономика жоготууга учурайт"

Коронавирустун кесепетинен ата мекендик экономика жоготууга учурап жатат, бирок биз үчүн калктын ден соолугу маанилүү. Мындай пикирди өкмөт башчы Мухаммедкалый Абылгазиев коронавирус инфекциясынын тийгизген таасиринин кесепеттерин азайтууга багытталган эки Республикалык штабдын ишин талкуулаган кеңешмеде билдиргенин басма сөз кызматынан маалымдашты.

"Коронавирус инфекциясынын экономикага тийгизген таасиринин кесепеттерин азайтууга багытталган чараларды жүзөгө ашыруу боюнча жана инфекциянын өлкө аймагына киришин алдын алуу жана жайылышына жол бербөө боюнча өлкөнүн көзөмөл-өткөрүү жайларында текшерүү күчөтүлгөн тартипте жүргүзүлүүдө. Эпидемиологиялык жагдайы жагымсыз болгон өлкөлөрдөн келген бардык жарандар 14 күндүк карантинге жаткырылууда. Бул бардык өлкөлөрдө кабыл алынган атайын чара", - деген Абылгазиев.

Мындан тышкары өкмөт башчы түзүлгөн кырдаалга байланыштуу бизнести өнүктүрүүгө көңүл буруу зарылдыгын баса белгилеген.

Ошондой эле Мухаммедкалый Абылгазиев Кыргыз өкмөтүнүн аппаратынын, министрликтердин жана ведомстволордун кызматкерлеринин инфекцияны жуктуруу тобокелдиги бар чет өлкөлөргө болуучу бардык иш сапарларын токтотууну тапшырганы айтылат маалыматта.