Чүйдө дайынсыз болгон 3 өспүрүм кыз Баткенден табылды. Алар алдын ала сүйлөшүп алып, 17 жаштагы бала менен бирге качышкан

Чүйдө дайынсыз болуп изделген өспүрүмдөр Баткен облусунан табылды. Бул тууралуу Чүй ОИИББинин басма сөз кызматынан билдиришти.

Маалыматка ылайык, 12-март күнү Аламүдүн РИИБине 37 жаштагы А.К. жана 35 жаштагы Т.Ы. аттуу жарандар кайрылышкан. Алардын кайрылуусунда 16 жаштагы кызы 10-март күнү үйдөн чыккан боюнча кайра кайтып келген эмес. Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган. Ыкчам иликтөө тобу изделип жаткан кыз Баткен облусуна кеткени боюнча маалымат алышкан.

"Баткен облусунан дайынсыз болуп жаткан өспүрүмдөр табылып, Бишкек шаарына 15-март күнү алып келинип, ата-энелерине өткөрүлүп берилген. Сотко чейинки өндүрүштө 3 өспүрүм кыз алдын ала сүйлөшүп алып, 17 жаштагы бала менен Баткен облусуна качып кетишкен. Алардын акчалары жок болгондуктан, таксистке Баткенге жеткенде ата-энелери тосуп аларын айтып, алдашкан. Бирок алар автобекетке жеткенде качып кетишкен. Кийин аларды милиция кызматкерлери кармаган", - деп жазылат билдирүүдө.

Учурда тергөө иштери жүрүүдө.