"Коронавируска байланыштуу ооруканаларды обсервация катары колдонуу чечими чыкса, түшүнүү менен кабыл алыш керек" дейт вице-премьер

"Жаңы-Жер айылындагы төрөткананы жаап жатышат. Себеби ал жакты жакында коронавирустун изолятору кылат экен" деп билдирген окурман "Элдик кабар" бөлүмүнө.

Буга байланыштуу SUPER.KG порталы бүгүн, 17-мартта өкмөт үйүндө өткөн коронавируска байланыштуу чараларды жүзөгө ашыруу жана инфекциянын өлкө аймагына киришин алдын алуу жана анын жайылышына жол бербөө боюнча маалымат жыйынында вице-премьер Алтынай Өмүрбековага "Шаардын четиндеги ооруканаларды обсервация үчүн колдонуп жатышы туура элеби?" деген суроо салды.

"Кырдаалга байланыштуу ар кандай чечим кабыл алынышы мүмкүн. Албетте, максималдуу түрдө баарына ыңгайлуу шарттардын болушун каалайбыз, ошого аракет кылабыз. Обсервацияга ооруган адамдар жаткырылбайт. Ал жакка дени сак, бирок ооруп калуу коркунучу бар адамдар карантинге алынат. Кытай Республикасынын тажрыйбасы боюнча коронавирустун 80 пайызы жеңил форма менен өтөт. Ошондуктан дүрбөлөңгө түшүп, чууга алдырбаш керек.

Албетте, Дүйнөлүк саламаттыкты сактоо уюму коронавирус боюнча так бир алгоритмдерди берген. Эгер вирус жуктуруу фактысы катталып калса, аны дарылоо протоколдору дагы анык. Ошондуктан биздин адистерге ишенип, кабыл алган чечимдерди туура түшүүгө аракет кылыш керек", - дейт Өмүрбекова.