"Жаратылыш калыбына келип жатат". Венецияда карантиндин кесепетинен каналдагы суулар тазаланган

Дүйнөнү дүрбөлөңгө түшүргөн коронавирустун кесепетинен Италиядагы жарыяланган карантин убагында Венециядагы шаар аралап өткөн каналдардагы суулар тазаланган. Бул жөнүндө дүйнөлүк басылмалар жазышууда.

Анда жазылгандай, азыркы учурда вирусту жуктуруп, жабыр тарткан адамдардын саны боюнча Италия өлкөсү экинчи орунда. Мындайча айтканда, Италия "жабык көшөгө" артында калды. Анда өлкө аймагындагы бардык музейлер, театрлар, окуу жайлары жана башка мекемелер жабылган. Ошондой эле адамдардын көчөгө чыгуусуна чектөө киргизилген.

Буга байланыштуу Италия өлкөсүндө карантин жарыяланган. Мындан шаар аралап өткөн каналдардагы суулар тазарганы байкалды. Суунун жана анда сүзүп жүргөн ак куулар, балыктардын сүрөттөрү социалдык тармактарга жарыяланган. Буга колдонуучулар миңдеген жакшы маанайдагы билдирүүлөрдү калтырышкан.

Учурдагы маалыматтарга ылайык, Италияда вирусту жуктуруп алгандар - 31 миң 506 болсо, каза болгондор - 2 миң 503, ал эми сакайгандар - 2 миң 941 адамды түзөт. Бул көрсөткүч менен Италия вирусту жуктуруп алгандардын саны боюнча дүйнөдөгү экинчи орунда келе жатат.