Коронавирустан улам бет каптарды кымбат баада саткан дарыканалар боюнча сот териштирүү жүргүзөт

Коронавирус коркунучунан улам бет каптарды кымбат баада саткан дарыканалар боюнча сот териштирүү жүргүзөт. Бул тууралуу Экономикалык кылмыштарга каршы мамлекеттик кызматы маалымат таратты.

Анда, 17-мартта Бишкектеги бир нече дарыканаларда атайын рейд уюштурулуп, бет каптардын бир даанасы 15 сомдон 50 сомго чейин сатылып жатканы аныкталганы тууралуу айтылат.

“15-мартта өкмөт атайын буйрук чыгарып, бир колго үчтөн ашык эмес бет кап сатуу, баасын 10 сомдон жогорулатпоо тууралуу талап койгон.

Рейддин жыйынтыгы менен ар бир дарыканадагы факт Кылмыштардын жана жоруктардын бирдиктүү реестрине Жазык кодексинин 216-беренесинин (монополисттик аракеттер же атаандаштыкты чектөө) негизинде каттоого алынды”, - деп айтылат маалыматта.

Финполиция мындай учурда 1955, 0 (312) 323 091, 323 707, 543 980, 541 712 номерлерине чалууну жарандардан өтүнөт.