Министрлик: "Медициналык мекемелерде бет каптар жана антисептикалык каражаттар жетиштүү"

Бүгүн, 18-мартта Өкмөт үйүндө саламаттыкты сактоо министринин орун басары Төлө Исаков маалымат жыйында медициналык мекемелерде бет каптар жана антисептикалык каражаттар жетиштүү экендигин билдирди.

Анда Исаков дарыканаларда медициналык бет каптардын жок болуп жаткандыгы тууралуу суроого төмөндөгүдөй жооп берди.

"Медициналык мекемелерде бет каптар жана антисептикалык каражаттар бар. Ал эми дарыканаларда чындыгында кооптонуу бар. Бир апта мурда 500 миңден ашуун бет каптар дарыканаларга таратылып берилген. Жакынкы арада бул маселе чечилет деп ойлойм. Өткөндө чек арадан миллиондон ашык бет каптарды чыгырып кетүүгө аракет кылган факты боюнча учурда сот процесси жүрүп жатат. Эгер сот биз тарапка чечип берсе, ал жактан алынган бет каптар дарыканаларга таратылып берилет", - дейт Төлө Исаков.

Мындан тышкары министрдин орун басары бет каптарды тигүү боюнча өндүрүш ишке киргенин кошумчалады.

"Буга чейин Кыргыз өлкөсү медициналык бет каптарды чыгарбай келсе, бүгүнкү күндө өзүбүздөн 25 миңден ашуун бет кап чыга баштады. Алардын басымдуу бөлүгү дарыканаларга берилет. Белгилей кетүүчү нерсе бет каптарды ооруган гана адамдар тагынышы керек", - дейт ал.