Умра сапарынан Кыргыз өлкөсүнө дагы 300 адам келет

Бүгүн, 18-мартта түштөн кийин өкмөттө 3-маалымат жыйын өттү. Анда саламаттыкты сактоо министринин орун басары Төлө Исаков маалымат берди. Журналисттердин суроолоруна жооп берип жатып ал өлкөгө умра сапарынан дагы 300 жаран кайтып келерин билдирди.

"100 адам келет, бирок бул коркунучтуу сан эмес. Алар ооруган адамдар эмес, кадимкидей эле биздин жарандарыбыз, сапардан кайткан адамдар. Биз аларды дароо карантинге алабыз. Текшерүүдөн өтөт. Коронавирусту аныктоого дагы 10 миң даана тестке буюртма кылдык", - деди ал.

Ошондой эле ал кийинки күндөрү дагы 200дөй жарандын келиши күтүлүп жатканын кошумчалады.

Бүгүн эртең менен өкмөт чукул жыйын өткөрүп, саламаттыкты сактоо министри өлкөдө 3 адамдан коронавирус аныкталганын маалымдаган. Алар Сузак районунун жарандары экени белгилүү болуп, аталган аймакка өзгөчө кырдаал киргизилген.