Коронавирус Кыргыз өлкөсүндө. Бул боюнча 18-марттагы кабарлардын ток этерин эле окугуңуз келсе...

18-мартта саламаттыкты сактоо министри Космосбек Чолпонбаев Кыргыз өлкөсүндө коронавирус алгачкы ирет катталганын билдирди.

Коронавирус жуктуруп алган 3 Кыргыз жараны өткөн аптанын бейшемби күнү, 12-мартта саат 20:57де «Эйр Арабия» авиакомпаниясынын рейси менен Сауд Арабиядан «Манас» аэропортуна учуп келген. Чартер каттамдын номери ABY 345. Умра зыяратынан кайтып келе жаткандар менен кошо аталган бортто 135 жүргүнчү болгон. Анын бардыгы табылып, карантинге алынды.

Коронавирус аныкталган 3 Кыргыз жараны обсервацияга алынган эмес. 12-мартта республикалык штаб коронавирустун чыккан учуру катталган өлкөлөрдөн келгендердин бардыгы 3 категорияга бөлүнөрүн маалымдаган. Сауд Арабия 3-категориянын ичинде болчу. Аталган өлкөлөрдөн келсе, баштапкы текшерүүгө алынып, андан ары үйүнө коё берилет деп айтылган.

Үчөө тең эркек, бири 70 жашта, экинчиси 1958-жылкы, үчүнчүсү 1974-жылы туулган. Алар Жалал-Абад облусуна караштуу Сузак районунун Благовещенка жана Бостон айылынын тургундары.

Коронавирус жуктуруп алган Кыргыз жарандарынын абалы канааттандырарлык. Алар Жалал-Абаддагы ооруканалардын биринде дарыланып жатышат.

Сузак районунда өзгөчө кырдаал жарыяланды. Бир катар чектөөлөр Благовещенка, Орто-Азия, Бостон айылдарына киргизилди.

19-марттан баштап Кыргыз өлкөсүнө бардык чет элдик жарандарга кирүүгө тыюу салынды.