Карантин бул каникул эмес! Башкы прокуратура карантиндин эрежесин сактабагандар жазага тартыларын эскертет

Коронавируска байланыштуу Кыргыз өлкөсүндө карантин жарыяланганына байланыштуу Башкы прокуратура жарандардан карантин эрежелерин сактоону жана негизсиз азык-түлүктөрдүн баасын жогорулаткандар жазага тартыларын эскертет. Бул тууралуу прокуратуранын басма сөз кызматы билдирүү таратты.

"Коронавирус инфекциясынын дүйнөгө таралуусу, анын арасында Кыргыз өлкөсүндө катталганына байланыштуу Башкы прокуратура турмуш-тиричиликке зарыл болгон азык-түлүктүн баасын негизсиз жогорулаткандарга жана карантин учурда эрежени бузгандарга эскертүү берет.

Азык-түлүктүн баасын негизсиз жогорулаткандар 216-берене (монополисттик аракеттер же атаандаштыкты чектөө) боюнча кылмышка тартылат.

Ал эми өлкө аймагында жарыяланган карантинге байланыштуу эрежени сактабай, башка адамдарга вирусту жуктурган учур катталса, күнөөлүү тарап 280-берене (атайылап же этиятсыздыктан санитардык-эпидемиологиялык эрежелерди бузган, байкабастыктан массалык ооруларга, адамдарды уулантууга же болбосо ири зыян келтирүүгө алып келүү) жана 127-берене (атайылап же этиятсыздыктан санитардык-эпидемиологиялык эрежелерди бузган, байкабастан ден соолукка зыян келтирүүгө жеткирүү) боюнча жазага тартылат.

Учурда укук коргоо кызматкерлери тарабынан 19 факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган. Ошондой эле азык-түлүк (ун, кумшекер) баасын негизсиз жогорулаткан 9 учур катталган. Андан сырткары коронавирус инфекциясы боюнча жалган маалымат тараткан 2 факты, чет өлкөлүк жарандын коронавируска текшерүү үчүн медициналык текшерүүдөн баш тарткан 1 учур катталган. Аталган фактылар боюнча учурда изилдөө иштери жүргүзүлүп, Башкы прокуратуранын көзөмөлүнө алынган", - деп жазылат маалыматта.