Коронавирус аныкталган сузактык тургундардын абалы тууралуу айтылды

Бүгүн, 20-мартта саламаттыкты сактоо министри Космосбек Чолпонбаев онлайн түрүндө маалымат берди. Белгилей кетсек, коронавирус боюнча маалымат жыйын күн сайын өтөт.

Жыйында коронавирус жуктуруп алган Сузак районунун тургундарынын абалы тууралуу айтылды.

"Коронавирусту жуктурганы аныкталган үч жарандын абалы канааттандырарлык. Алардын оорусу өтө оор эмес формада өтүп жатат. Дене табы бирде пайда болуп, бирде жок болуп жатат. Албетте, алар психологиялык жактан дагы басыңкы маанайда болуп жатышат. Бирок биз бул боюнча иш алып барып жатабыз. Ал эми алар менен чогуу учуп келгендердин экөө тест тапшырган, жыйынтыгы бүгүн чыгат. Ошондой эле өзүн жакшы сезбей, ооруканага түшкөн жарандын дагы абалы канааттандырарлык. Ал тапшырган тесттин жыйынтыгы чыга элек. Учурда бейтаптарга тийиштүү дарылануу жана симптомикалык дарылоо жүргүзүлүүдө. Мындан тышкары кошумча вируска жана бактерияга каршы комбинацияларды колдоно баштадык. Бишкек жана Жалал-Абаддын дарыгерлери менен күнүгө консилиум өтүп жатышат. Белгилей кетүүчү нерсе, ал жакка эч ким кире албайт жана бейтаптарды карап жаткан дарыгерлер дагы чыга албайт", - деди министр.