Министрдин орун басары: "Медицина кызматкерлерине алган айлыгынан тышкары 10 миң сомдон 25 миң сомго чейин кошумча акча бөлүнөт"

Медицина кызматкерлеринин айлыгына кошумча каражат каралат. Бул тууралуу бүгүн, 21-мартта саламаттыкты сактоо министринин орун басары Төлө Исаков онлайн маалымат жыйынында билдирди.

Анын айтымында, алардын буга чейин алып жүргөн айлыгы сакталат. "Мындай оор кырдаалда иштеп жаткан дарыгерлерге кошумча каражат берилет. Аларга өзүнүн маянасынан сырткары 10 миң сомдон 25 миң сомго чейин кошумча акча берилет", - дейт ал.

Ал коронавируска каршы күрөшүүгө бөлүнгөн 30 миллион сом дарыгерлердин айлык-акысына эмес, беткаптарды, коргоо костюмдарын, изоляторду ачууга керектүү атайын шаймандарды сатып алууга жумшала турганын айтты.

Кыргыз мамлекетинде коронавирус жуктурган дагы 6 жаӊы учур катталды. Ооругандардын жалпы саны 12 адам.

18-мартта Сузакта коронавирус үч кишиден аныкталган. Кечээ, 20-мартта Ноокатта коронавирустун жаңы 3 учуру катталганы жарыяланган.