Эмне үчүн Германияда коронавирус жуктуруп алгандар көп, бирок бул илдеттен каза болгондор башка өлкөлөргө караганда аз? Эксперттин пикири

Германияда коронавирусту жуктуруп алгандардын саны көп болгонуна карабай, бул илдеттен каза болгондордун саны аз болуп жатат. Бул тууралуу дүйнөлүк ЖМКлар жазып чыгышты.

Германияда 16 миң 600дөн ашуун адамдан коронавирус аныкталган, учурда каза болгондордун саны 47 адам болгон. Ошол эле учурда Италияда жуктуруп алгандардын саны 53 миң кишиден ашуун, ал эми каза болгондор 4 825 адам. Мындайча айтканда, Германияда коронавирус жуктуруп алгандар Италияга караганда үч эсе аз, бирок Италияда каза болгондордун саны 100 эсеге көп.

Эксперттер мындай айырманы Германияда коронавирусту баштапкы стадиясында аныктап жатышканына жана жуктуруп алгандар салыштырмалуу жаштар экендигинде дешүүдө. Роберт Кох институтунун эсептөөсү боюнча, Германияда илдетке чалдыккандардын 80 пайыздан ашууну 60 жашка чыга электер. Германияда адистер апта сайын 160 миң анализ жүргүзүп жатат. Немистердин мындай мүмкүнчүлүгү керек болсо, бардык европалык мамлекеттерде жүргүзүлүп жаткан анализдерди кошсо да Германияныкына жетпейт. Массалык тест жүргүзүү кыска убакыттын ичинде каза болгондордун санын азайтат дешет немис дарыгерлери. Алардын айтымында, массалык түрдө тест жүргүзүү симптому жок айрым коронавирус жуктуруп алган адамдарды аныктоого жардам берет жана башкаларга жуктурбоого бөгөт коюлат.

Дагы бир фактор - бул ооруканалардын керектүү жабдыктар менен толук камсыз болуусу. Марттын орто ченинде Германиянын өкмөтү жасалма дем алдыруу 10 миң аппаратка буюртма берди. Ага чейин аталган өлкөдө 25 миңдей аппарат бар болгон.