Ички иштер министринин орун басары: "Ноокаттан Чүйгө качып кетти деген кыздын окуясы иликтенүүдө"

Бүгүн, 22-мартта Өкмөт үйүндө ички иштер министринин орун басары Алмазбек Орозалиев өлкөдө өзгөчө кырдаал киргенине байланыштуу кандай иш аракеттер көрүлүп жатканы тууралуу онлайн маалымат жыйынын берүүдө.

Жыйында Ноокат районунан Чүй облусуна качып кетти деген кыз тууралуу маалымат айтылды.

"Менин билишимче, ал кыз качып кеткен эмес. Ал карантин жарыяланганга чейин чыгып кетиптир. Андыктан учурда бул окуя боюнча иликтөө жүрүп жатат. Хронология такталгандан кийин ал жарандын жоопкерчиликке тартуу маселеси каралат", - дейт Орозалиев.

Буга чейин коронавирус оорусу аныкталган жарандын кызы Ноокат районунан Чүй облусуна такси менен качып келгендиги тууралуу маалымат тараган.

Кыргыз өлкөсүндө коронавирус аныкталгандардын жалпы саны 14 адам.

Саламаттыкты сактоо министрлигинен билдиришкендей, COVID-19 вирусун жуктургандардын бардык учурлары сырттан келген.