Өкмөт: "Ирандын аймагында калып калган 60 жүк ташуучу унаанын айдоочулары мекенине кайтып келе жатышат"

Кыргыз Республикасынан чыккан жүк ташуучулардын маселеси чечилип, алар мекенине кайтып келе жатышат.

Тышкы иштер министрлигинин маалыматы боюнча, кеп Азербайжан Республикасы жана Түркмөнстан өз чек арасын жапкандыгына байланыштуу Иран Ислам Республикасынын аймагында калып калган 60 жүк ташуучу унаанын айдоочулары тууралуу болуп жатат.

Учурда 60 айдоочунун ичинен 21и Орусия Федерациясынын аймагында турушат жана Орусия-Казак чек арасы тарапка, «Караозек» көзөмөл-өткөрмө жайына жөнөшүүдө.

10 унаа Азербайжан Республикасынын Орусия Федерациясы менен чек арасындагы «Самур» көзөмөл-өткөрмө жайынан өтүү үчүн күтүп турушат.

25 унаа Казакстан Республикасы аркылуу Кыргыз Республикасына келе жатышат. Дагы бир айдоочу Казакстан Республикасынын Орусия Федерациясы менен чек арасынан өткөндөн кийин карантинге алынды. Анткени ал Казакстан Республикасынын жараны болуп саналат.

Тышкы иштер министрлиги бул маселе өзгөчө көзөмөлдө, ал эми айдоочулар менен үзгүлтүксүз байланыш бар экендигин эскертет.