Саламаттыкты сактоо министрлиги: "Жарандар изоляция эрежелерин толук сактабай жатышат"

Бүгүн, 23-мартта Өкмөт үйүндө Саламаттыкты сактоо министрлигинин коомдук саламаттыкты сактоо башкармалыгынын башчысы Айнура Акматова онлайн маалымат жыйын берүүдө.

Жыйында Кыргыз өлкөсүнүн жарандары кырдаалды түшүнбөй эң жөнөкөй гигиеналык эрежелерди сактабай жаткандары айтылды.

"Биздин жарандар изоляциянын эрежелерин толук түрдө сактабай жатышат. Андыктан дагы бир жолу аларга кайрылып кетээр элем. Коомдук тамактануу жайлардан тамактанбай, туугандардыкына барбай, колдон келишинче үйдө отурганга аракет кылгыла. Бири-бири менен кол алышып учурашпоо, колду бат-баттан самын менен жакшылап жууп туруу керек. Дүкөнгө үй-бүлөнүн бир гана мүчөсү баруу керек", - дейт Акматова.

Кыргыз өлкөсүндө коронавирус жуктурган 14 учур бойдон калууда. 14 адамдын бири жандандыруу бөлүмүнө жаткырылганы маалымдалды.

Саламаттыкты сактоо министри Космосбек Чолпонбаев вирус жуктургандардын баары сырттан келгендигин айткан.