"ЭЛДИК КАБАРга" жооп: Москва-Бишкек темир жол каттамы менен келгендер текшерилген жок деген кабарга "Кыргыз темир жолу" жооп берди

Буга чейин "Элдик кабар" бөлүмүнө "Москва-Бишкек темир жол каттамы менен келдик, жүргүнчүлөрдү коронавирусту аныктоо үчүн текшеришкен жок" деп кайрылган окурмандын кайрылуусу чыккан.

"Кыргыз темир жолу" ишканасынын басма сөз кызматынан маалымат чындыкка жатпай турганын билдиришти.

"Москвадан поезд 20-мартка караган түнү Бишкекке келген. Поезддин жетекчиси Абдылдаев жүргүнчүлөр текшерүүдөн өткөнү тууралуу видео отчёт берген. Чек араны жалпы 59 жүргүнчү, 20 поезд бригадасынын мүчөсү жана 5 вагон ресторанынын кызматкерлери кесип өтүшкөн. "Кайыңды" постунан санитардык-эпидемиологиялык станциянын кызматкерлери тарабынан тепловизор менен ар бир жүргүнчү, поезд бригадасынын мүчөлөрү текшерилип, эч кимден коронавирус оорусуна шек аныкталган эмес", - деп билдиришет басма сөз кызматынан.

Ошондой эле ишканадан 17-марттан тартып Кыргыз өлкөсүнөн кетүүчү бардык эл аралык темир жол каттамдары убактылуу токтотулганын билдиришти.