ЖЭБ иши боюнча биринчи өкүмдү шаардык сот күчүндө калтырды. Бир гана Айбек Калиевдин мөөнөтү бир жылга кыскарды

Бүгүн, 23-мартта Бишкек шаардык сотунда ЖЭБ иши боюнча айыпталып жаткандарга чечим чыкты.

Ага ылайык, "Улуттук энергетикалык холдингдин" мурдагы башчысы Айбек Калиев 14 жылга эркинен ажыратылды, ал эми мурдагы өкмөт башчылар Жантөрө Сатыбалдиев менен Сапар Исаков жана "Электр станциялары" ишканасынын мурдагы башчысы Салайдин Авазовго карата чечим Свердлов райондук сотунун өкүмү боюнча күчүндө калтырылды.

Жалпысынан шаардык соту ЖЭБ иши боюнча өтүп жаткан бардык айыпталуучулардын жаза мөөнөтүн биринчи инстанциянын чечими менен калтырып, бир гана Айбек Калиевдин жаза мөөнөтүн бир жылга кыскартты.

Ошондой эле Сапар Исаков, Жантөрө Сатыбалдиев, Айбек Калиев, Салайдин Авазов, мурдагы финансы министри Ольга Лаврова, "Электр станциялары" ишканасынын башчысынын мурдагы орун басары Жолдошбек Назаров жана Бишкек жылуулук электр борборун модернизациялоону башкаруу боюнча топтун мурдагы аткаруучу директору Темирлан Бримкулов финансы министрлигине 5 миллиард 439 миллион сом чыгым төлөө милдеттендирилди.

Ал эми мурдагы депутат Осмонбек Артыкбаев карата үй-мүлкүнө коюлган арест боюнча өзгөртүү киргизилип, ага ылайык Артыкбаевге тиешелүү үчүнчү адамдар категориясынын үй-мүлкүн арестке алуу жоюлду.

Жактоочу Замир Жоошев шаардык соттун чечими боюнча бардык айыпталуучуларга карата өзгөрүү болбогонун жана бул боюнча Жогорку Сотко кайрылуу маселеси чечиле элек экенин SUPER.KG порталына билдирди.