"Жөн эле сейилдегенди токтоткула!". Куралдуу күчтөрдүн башкы штабынын башчысы элди айылчылаганды токтотууга чакырды

Бүгүн, 24-мартта Куралдуу күчтөрдүн башкы штабынын башчысы Райимберди Дүйшөмбиев менен ИИМ башчысынын орун басары Алмазбек Орозалиев өлкөдө өзгөчө режим киргизилген аймактардагы тартиптер тууралуу маалымат беришти. Онлайн форматта өткөн жыйында өкмөт өкүлдөрү тургундарды бул режимдин бардык эрежелерин сактоого чакырышты.

"Айыл өкмөт, район башчысы, облус башчысы, айтор, өкмөт өкүлдөрүнүн бардык бутактары элге так, туура маалыматтарды жеткирип турушу керек. Өзгөчө режим кирген аймактарга башка жактан келгендер болсо, шашылыш чыгып кетпесе бул режим алынганга чейин чыга албай калат. Биз эми бири-бирибиздин ал-акыбалыбызды сураганды, айылчылаганды, жөн эле сейилдеп жүргөндү токтотушубуз керек.

Жүк ташыган, материалдык-техникалык каражаттарды, азык-түлүктөрдү ташыган унааларга тыюу жок, алар жана аларды жөнөтүп жаткан кампалардагы ишкерлер коменданттык саат аяктаганга чейин кадимкидей иштей берет.

Бардык маалыматтарды коменданттар бекилген тартипте коомчулукка жеткирип турат. Кайсы бир өзгөрүүлөр, тартиптер кошулса маалыматтар таратылат", - деди Дүйшөмбиев.