АКШнын тургуну коронавирустун тестин күтүп жатып көз жумду

АКШнын Луизиана штатынын 39 жаштагы тургуну коронавируска тапшырган тесттин жыйынтыгын күтүп жатып көз жумду. Бул тууралуу чет элдик басылмалар жазып чыгышты.

10-март күнү Наташа Отт сасык тумоонун белгилери менен ооруканага кайрылган. Ал ВИЧ-инфекциясы менен ооругандарга социалдык жардам көрсөткөн борбордо иштегендиктен, коронавирус оорусун жуктуруп алуу коркунучу жогору болчу. Бирок дарыгерлер анда коронавирустун белгилери жок деп тест албай коюшкан. Ал эми өзү иштеген социалдык борбордо кесиптештери тесттен өтүүнү сунуштаган. Бирок 5 гана тест болгондуктан, башкаларга көбүрөөк керек деп баш тартып койгон. Бир апта бою Наташанын абалы оорлошуп, 16-мартта экинчи ирет медициналык жардам сурап кайрылган. Дарыгерлер андан тест алышканы менен жыйынтыгы 5 күндө даяр болот деп айтышкан. Тесттин жыйынтыгы чыкканча үйдөн чыкпай изоляцияда отурган Наташа 20-марттан тартып байланышка чыкпай калган. Анын таанышы кабар алуу үчүн үйүнө барганда, ашканадан жансыз денесин тапкан. «Бул аябай коркунучтуу жоготуу. Пандемия тууралуу тамашалар өттү, кеч болуп калганча жакындарыңыздарга кам көрүңүздөр», - деп жазган Наташанын таанышы Андерсон социалдык тармактагы баракчасына.

Учурда Луизиана штатынын полиция кызматы маркумдун өлүмүнүн чыныгы себебин аныктоо үчүн иш алып барууда.