"Путин жана анын стилдүү коронавирустан коргоочу костюму". Орус президентинин кийимин келекеге алышууда

Орусиянын президенти Владимир Путин кечээ, 24-мартта коронавирус менен жабыркап жаткан бейтаптар жаткан ооруканага барып, ал жактагы абалды өз көзү менен көрүп кайткан. Бул тууралуу орусиялык маалымат булактары жазышты.

Анда имараттын ичин президент башкы дарыгердин коштоосунда аралап, кээ бир бейтаптар жаткан бөлмөлөргө күтүүсүз кирип барган. Ал жакта жаткан бейтаптардын бирөө жергиликтүү маалымат булактарынын бирине президенттин ал жаткан бөлмөгө кирип келгени күтүүсүз болгонун жана ал Путин менен даярдыксыз жолугушуп калганы тууралуу айтып берген.

"Мени бул жолугушууга даярдашкан жок. Өлкө башчынын бөлмөгө кирип келээрин 2 мүнөт мурун гана угуп, билдим. Анда дагы кызматкерлер "жаткан төшөгүңдү ондоп-түзө" дешти, мен аны оңдоого гана жетиштим", - деп билдирген Дмитрий аттуу бейтап.

Ошол эле учурда Владимир Путиндин бейтапкананы аралап жүргөндө кийген кийими социалдык тармактын колдонуучулары тарабынан кызуу талкууга алынууда. Аны колдонуучулар "Путин жана анын стилдүү коронавирустан коргоочу костюму" деп келекелеп жатышат. Мындан сырткары алардын арасында Путинди мультфильмдин персонажына, кинонун каарманына окшоштуруп жаткандар дагы бар.

Мындай учур Кыргыз өлкөсүндө дагы болгон. Өзгөчө кырдаалдар министри Замирбек Аскаров 23-мартта "Ак-Кеме" мейманканасына жана чет өлкөдөн келген жарандар карантинде кармалып жаткан №1 интернатка барганда, кийип барган коргоочу кийими социалдык желелерде кызуу кепке алынган. Анда Аскаровдун кийген кийими менен дарыгердин кийген кийимин салыштырып, ага кыжырланган колдонуучулар болгон.