"Электр энергиясы үчүн төлөмдөрдү жүргүзүү жана эсептөө кантип ишке ашырылат?" "Улуттук энергетикалык холдинг " ишканасынын жообу

Өлкө боюнча өзгөчө кырдаал, ал эми Бишкек шаары жана бир катар аймактарда өзгөчө абал киргизилгенине байланыштуу жарандарда "Коммуналдык төлөмдөр кандай жүргүзүлөт жана кантип эсептелет?" деген суроо пайда болду.

Буга байланыштуу SUPER.KG порталына "Улуттук энергетикалык холдингдин" коом менен байланыш бөлүмүнүн башчысы Нурдин Султамбаев төмөндөгүдөй маалымат берди:

"Мындай кырдаалда абоненттер, албетте, эсеп көрсөткүчтөрүн онлайн жөнөтүшөт. Бул үчүн кайсы аймактын абоненти болгонуна жараша ал ишкананын расмий сайтына кирип, бардык байланыш телефондорун жана WhatsApp номурларын билип алса болот. Мындан тышкары Бишкек шаарындагылар жана акылдуу эсептегич коюлган аймактардагы абоненттер үчүн тиркеме иштелип чыгып жатат. Ал тиркемени жүктөгөн жаран электр энергиясына тиешелүү бардык операцияларды жүргүзө алат. Эсеп көрсөткүчтөрүн жөнөтө алат, кайра электр энергиясы үчүн канча акча чыкканын көрүп, төлөм жүргүзөт. Абоненттин андай мүмкүнчүлүгү жок болсо, расмий сайттардан өзүнө тиешелүү төлөмдөрдү, квитанцияларды көрө алат. Эсептегичтердин көрсөтмөсү ар бир айдын 28инен баштап кабыл алынат", - деп жооп берди Султамбаев.

Эгерде сиздин электр эсептегичтин көрсөтмөсү алынбай калса, эсеп-дүмүрчөк өткөн айдын орточо эсеби менен чыгарылат. Кийинки айда так көрсөтмө алынгандан кийин эсеп-билдирме түздөлөт.

"Улуттук энергетикалык холдинг" кабыл алынган чараларды түшүнүү менен кабыл алууну суранат жана абоненттерди электр энергиясына болгон төлөмдөрдү аралыктан электрондук капчыктар же төлөм терминалдары аркылуу төлөөгө чакырат.

"Түндүк электр" ишканасы - күнү-түнү иштөөчү колл-борборунун номуру 1209, мындан тышкары 0772/0702/0556 – 001209 номерлеринен тактап сурап алса болот.

"Ош электр" ишканасы - call center 151, WhatsApp 0777 90 90 76 03222 8 25 15

"Жалалабат электр" - Ишеним телефону 149, Диспетчердик жана технологиялык башкаруу кызматы 0(3722) 5-60-12