Бойдоксузбу? Анда учурдан пайдаланып, эч чыгымсыз той өткөрүп алыңыз

Казакстанда өлкө боюнча өзгөчө кырдаал киргенине байланыштуу жарандар онлайн түрдө үйлөнүү тойлорун өткөзүүдө. Бул тууралуу жергиликтүү маалымат каражаттары жазып чыгышты.

Маалыматка ылайык, онлайн тойду алгач Нур-Султан шаарынын тургундары өткөргөн. Азамат жана Асель өзүнүн тоюн март айына болжошкон. Аселдин кыз узатуу тою анын туулуп өскөн Арысь шаарында өтмөк. Бирок болуп жаткан кырдаалдан улам кыздын ата-энеси балдарды көпкө күттүрбөй видео чалуу аркылуу өз баталарын беришкен.

"Алгач биз эмне кыларыбызды билбей көпкө ойлондук. Кырдаалды түшүнүп, биздин саламаттыгыбыз үчүн жубайымдын ата-энеси батасын видео чалуу аркылуу беришти. Мечиттен атайын молдо чакырып никебизди кыйдырып, үй-бүлөбүз менен белгилеп койдук. Биз Казакстандын жарандарыбыз, өлкөбүздө болуп жаткан абалды түшүнүп тобокелдикке барган жокпуз. Мындай учурда ар бир адам жоопкерчиликти сезе билиши керек", - деп билдирген Азамат.