Кытай эпидемиологу Италия эмне үчүн коронавирус менен эффективдүү күрөшө албай жаткандыгын айтты

Италияга келген Кытай эпидемиологдорунун экинчи тобунун башчысы Цю Юньцин өлкөдөгү, ооруканадагы абал тууралуу маалымат берип, эмне үчүн Италия коронавирус менен эффективдүү күрөшө албай жаткандыгынын себебин айткан.

Италияда коронавирус жуктургандардын саны күн санап өсүп жатканына байланыштуу Кытайдан эксперт-эпидемиологдордун экинчи тобу тартылган. Топтун башчысы Цю Юньциндин айтымында, Италия коронавирус пандемиясы менен эффективдүү күрөшө албай жатканынын эки себеби бар. Ал эң чоң маселе катары медициналык кызматкерлердин жана реагенттердин жетишсиздигинен көпчүлүк текшерүүдөн өтпөгөнүн жана азыркы күнгө чейин инфекциянын булагы ким болгону аныктала электигин белгилеген. Ошондон улам италиялыктар коронавируска кабылган адам менен коомдук жайда бир болуп, байланышып жүрүшү ыктымал деген. Ал "Эпидемия менен күрөшүүдө алгач инфекцияны тараткан адамды тапмайын коронавирус жуктургандарды дарылап, ооруканадан чыгаруудан ойдогудай жыйынтык чыкпайт" деген.

Ошондой эле ооруканадагы дарыгерлер изоляция тууралуу толук маалымдалбаганын билдирген. "Палаталарда бир учурда 100дөгөн бейтап жатат. Мындай учурда ар кандай инфекциялар аралашып, кайра башкаларга өтүп кетиши ыктымал", - деп билдирген Цю Юньцин.

Кытай эпидемиологдору Италияга кытай медицинасынын дарыларын ала келип, практикада колдонушууда. Учурда 400дөн ашуун бейтапка жардам көрсөтүшкөнү айтылат. Эпидемиологдун айтымында, кытай медицинасынын дарылары коронавирустун жеңил түрү менен жабыркагандарга жана вирустун алдын алууга жакшы таасирин берет.