Жогорку Кеңештин кызматкери патрулдук милиция кызматкерине кол көтөргөнү айтылууда. Ал эми кызматкердин жубайы маалыматтын көбү калп экенин билдирди

Жогорку Кеңештин Эл аралык иштер, коргоо жана коопсуздук боюнча комитетинин бөлүм башчысынын орун басары Эрнест Молдошев мас абалында патрулдук милициянын кызматкерине кол көтөргөнү боюнча айрым маалымат каражаттары өздүк булактарына таянып жазып чыгышты.

Эрнест Молдошевдин жубайы Айдай SUPER.KG порталына билдиргендей, ал маалымат каражаттарында жазылган маалыматты окуган. "Биз дагы бул маалыматты окудук. Азырынча эч кандай комментарий бере албайбыз. Учурда жолдошум Жогорку Кеңеште иштебейт. Ал жакта жазылган көп маалыматтар туура эмес. Тийиштүү адамдар менен сүйлөшүп, андан кийин силер менен байланышабыз", - дейт Эрнест Молдошевдин жубайы.

"25-мартка караган түнү Жогорку Кеңештин кызматкери мас абалында Тойота Ленд Крузер унаасы менен шаарга чыккан. Аны патрулдук милиция кызматкерлери токтотсо, баш ийбей кетип калган. Артынан барып токтоткондо, ал милиция кызматкерине кол көтөргөн. Мындан улам Молдошев убактылуу кармоочу жайга киргизилген. Бирок соттун чечими менен ал үй камагына чыгарылды", - деп жергиликтүү маалымат каражаттары жазышты .