ЖАМК: "Алмаз Сулайманов Балыкчы шаарындагы №51 жатак абакта жазасын өтөп жаткан"

Бүгүн, 28-мартта Нарында Лимонти каймана аты менен белгилүү кримавторитет Алмаз Сулаймановду өлтүрүп кетишкен.

Жазаларды аткаруу мамлекеттик кызматы Алмаз Сулайманов Ысык-Көл облусуна караштуу Балыкчы шаарындагы №51 жатак абагынын Нарындагы өндүрүш участогунда жазасын өтөп жүргөнүн билдирди.

"Ал жашаган жери боюнча жазасын өтөп жүргөн", - деди басма сөз кызматы.

Алмаз Сулайманов 1971-жылы туулган. Мурда бир нече жолу соттолгон. 2006-жылы 30 жылга эркинен ажыратылган.

2008-жылдын май айында Аламүдүн райондук сотунун чечими менен Алмаз Сулайманов абактан ден соолугуна (кургак учук диагнозу коюлган) байланыштуу мөөнөтүнөн эрте бошотулган. 2011-жылы ага карата эл аралык издөө жарыяланган. 2013-жылы да Казакстандын Алматы облусунан кармалып, Кыргыз өлкөсүнө жөнөтүлгөн.

Андан соң ал 20 жылга эркинен ажыратылган.