Алпаруучу Ассоль Молдокматова балконуна чыгып, концерт коюп жатат

Бүгүн, 28-мартта Бишкек шаарында алпаруучу Ассоль Молдокматова үйүнүн балконуна чыгып, концерт коюп жатат. Анда ырчы Кайрат Примбердиев өзүнүн ырларын тартуулоодо. Алардын концертин көчөдө өтүп бараткан тургундар көрүшүүдө. Ошондой эле шаардыктар үйлөрүнүн балконунан көрүп жатышат.

Шаарда элдин саны мурункуга салыштырмалуу бир топ аз.

Кечээ, 27-мартта Кайрат Примбердиев эки сааттан ашык Инстаграм баракчасында түз эфирде концерт берген.

Дүйнөдө коронавирус илдети жайылып, Кыргыз өлкөсүндө алгачкы ирет коронавирустун катталышына 10 күн болду. Президент Сооронбай Жээнбеков Бишкек жана Ош шаарынын, Ноокат, Кара-Суу райондорунун, Жалал-Абад шаарынын жана Сузак районунун аймагында өзгөчө абал киргизүү жөнүндөгү жарлыктарга кол койгон. Жогорку Кеңештин депутаттары аталган үч жарлыкты бекитүүнү толук колдоо менен атайын токтом кабыл алышкан.

Өзгөчө абал 25-марттан 15-апрелге чейин киргизилген. Ага ылайык, жарандарга кечки саат 20:00дөн баштап эртең мененки саат 07:00гө чейин коменданттык саат жарыяланып, бул мезгилде үйдөн чыкпай туруусу айтылган.