"Исмаил Матраимов" кайрымдуулук фонду 30-мартка чейин өлкөнүн бардык аймактарына медициналык бет каптарды таратат

30-мартка чейин өлкөнүн бардык аймактарына акысыз медициналык бет каптар таратылат. Мындай жардамды "Исмаил Матраимов" кайрымдуулук фонду ишке ашырарын депутат Искендер Матраимов Фейсбуктагы баракчасына жарыялады.

"Таажы ылаӊы Кыргыз өлкөсүн катталган алгачкы күндөрү эл дүрбөлөӊгө түштү. Дарыканалардан тиешелүү дары-дармектер, айрыкча бет каптарды табуу кыйынга турду. Ошол маалда "Исмаил Матраимов" кайрымдуулук фонду элге бет кап таратуу боюнча демилгени колго алып, сатып алууну максат кылдык. Бирок биз болжогондой бет капты дароо таба алган жокпуз. Таратуу үчүн алган бет каптар жетишсиз болгондуктан, жергиликтүү тигүү цехтерине дагы кайрылып, алардан стандартка жооп бере тургандай тигип берүү өтүнүчү менен кайрылуу кылганбыз.

Бир апта мурда фонд Кыргыз өлкөсүндөгү карантиндик аймактарга бет каптарды акысыз таратуу максатында, 5 миллион сомго жергиликтүү өндүрүштөгү медициналык бет каптарды алууга сынак жарыялаган.
Жергиликтүү тигүү цехтеринен 500дөн ашык сунуштарды кабыл алып, Ош жана Бишкек шаарларындагы эки өндүрүш тандалып алынган. Фонд жалпы суммасы 4 миллион 280 миң сомго, 240 миң даана бет кап алып, калган 720 миң сомду ИВЛ жабдыктарын сатып алууга кошуу чечимин кабыл алды.
Алып келип берүүчү төмөндөгү талаптар боюнча тандалган:

1. Сапат жана нарктын туура келиши;
2. Уруксат иш кагаздарынын так болушу;
3. Цехтердин жайгашкан жери жана даярдоо көлөмү.

Бүгүнкү күндө фонд Ош, Баткен жана Жалал- Абад облустарына бет каптарды таратууга жетишти. Калган аймактарга таратуу 2020-жылдын 30-мартына чейин улантылат.

Урматтоо менен, "Исмаил Матраимов" кайрымдуулук фондунун командасы", - деп айтылат билдирүүдө.