Башкаларга үлгү болчудай! Ат-Башы районунун Биринчи Май айыл тургундары өз демилгелери менен карантиндик пост уюштурушту (видео)

Нарын облусуна караштуу Ат-Башы районундагы Биринчи Май айыл аймагынын тургундары өз демилгелери жана күчтөрү менен карантиндик пост уюштурушту. Бул тууралуу SUPER.KG порталына аталган айылдын жашоочусу жана активисти Муктарбек Байшериев билдирди.

Активисттин айтымында, өлкөдөгү эпидемиологиялык абалды эске алып, айыл жашоочуларынын саламаттыгы жана коопсуздугу үчүн карантиндик пост уюштуруп, кирген-чыккандарды көзөмөлдөп туруу чечими кабыл алынган.

"Учурдагы кырдаалды жөнгө салуу үчүн өкмөт иш-аракеттерди жасоодо. Бирок алар баардыгына жетишпейт да. Мындай учурда ар бир жаран жана аймак карантиндин эрежелерин сактап, колдон келген салымдарын кошуш керек деп ойлойм", - дейт Муктарбек Байшериев.

Биринчи Май айылынын кире беришинде уюшулган карантиндик пост тартылган тасмада айылдык кеңештин депутаты алардын айылында посттон тышкары дезинфекциялоо иштери жүрүп жатканын айтып берген.