"Көчөдө жүргөндөр көп". Бишкекте жөө патрулдук 410 кызматкер ишке кирди

Бүгүн, 30-мартта Өкмөт үйүндө биринчи вице-премьер-министр Кубатбек Боронов, ички иштер министри Кашкар Жунушалиев жана саламаттыкты сактоо министри Космосбек Чолпонбаевдин катышуусунда онлайн маалымат жыйын өтүүдө.

Жыйында жарандар, айрыкча Бишкек шаарынын тургундары абалды түшүнбөй жатышканы айтылды.

"Шаарда өзгөчө абал киргизилгенине карабастан, көчөдө жүргөндөр көп болуп жатат. Учурда 410 жөө жүрүүчү патрулдук кызматкерлер ишке кирди. Булар жарандарды тартипке чакырууга салым кошот.

Элди тамак-аш менен камсыздаган ишкерлерге уруксат болгон. Блокпосттордун коюлганына карабай мыйзам бузуу уланууда. Тилекке каршы, шаар тургундары абалды аягына чейин толук түшүнбөй жатышат", - деди Боронов.

30-мартта коронавирус менен дагы 10 адам жабыркап жатканы аныкталды. Жалпысынан оору жуктуруп алгандардын саны 94 адамга жетти. Вирусту жуктурган акыркы он адам Жалал-Абад облусунун тургундары.