Хабиб Нурмагомедов: "Орусиядан учуп кете албай калдым. UFC уюму Фергюсонго башка атаандаш издеп жатат"

UFC уюмунун чемпиону орусиялык Хабиб Нурмагомедов өлкөдөн коронавирус пандемиясынан улам учуп чыга албай калгандыгын, азыркы учурда Дагестанда экенин, UFC уюму буга байланыштуу америкалык мушкер Тони Фергюсонго башка атаандаш издеп жаткандыгын өзүнүн социалдык баракчасы аркылуу түз эфирде бүгүн, 30-мартта айтты.

"Азыркы учурда мен Дагестандамын. Машыгып жатам. Бирок эмне үчүн машыгып жатканымды билбейм. Мага азыр UFC уюму бул беттешти АКШнын кайсы бир штатына өткөрүүнү сүйлөшкөндүгү тууралуу маалымат келди. Бирок мен азыр Орусиядан учуп кете албайм. Мага жеткен маалыматтар боюнча UFC уюму Фергюсонго башка атаандаш издеп жатыптыр", - деп билдирди орусиялык мушкер түз эфирде.

Маалыматка ылайык, буга чейин Хабиб Нурмагомедов бүгүн, 30-мартта Орусиянын аймагынан чыгып кетпесе, аталган өлкө коронавирус пандемиясынан улам чек арасын жапкандыгына байланыштуу беттешке катыша албай кала тургандыгы кабарланган.