Дональд Трамп: "Коронавирустан 100 миңден 200 миңге чейин америкалыктар каза болсо, анда биз бул вируска каршы жакшы күрөштүк деп айта алабыз"

АКШнын президенти Дональд Трамп азыркы учурда дүйнө элин коркунучка салып турган коронавирус оорусунун айынан Америкада канча адам каза болушу мүмкүн экенин айтты. Бул тууралуу ал маалымат жыйыны учурунда билдиргенин чет элдик басылмалар жазып чыгышты.

"Бул вирустан 2 миллион 200 миң америкалыктар каза болот деп айтып жатышат. Биз бул санды 100 миңге чейин түшүрсөк, анда бул абдан коркунучтуу сан. Балким, мындан дагы төмөн. Биз азыр 100 миңден 200 миңге чейин адам каза болот деп болжолдоп жатабыз. Эгер чын эле ушундай болсо, анда бул биздин коронавируска каршы жакшы күрөшүп жатканыбыздын белгиси", - деп билдирген АКШнын президенти.

28-мартта АКШнын Аллергия жана жугуштуу оорулар улуттук институнун директору Энтони Фаучи жергиликтүү CNN телеканалына коронавирус пандемиясынын айынан 100 миңден 200 миңге чейин америкалыктар каза болушу мүмкүн экендигин билдирген.

Акыркы маалыматтар боюнча, АКШ дүйнө жүзүндө коронавирус пандемиясын жуктурган өлкөлөрдүн сап башында турат. Бул өлкөдө коронавирусту 143 миң 55 адам жуктуруп алган болсо, 2 миң 513 адам бул оорудан каза болгон.