Коронавирус аныкталган Нарын шаарынын тургуну 154 киши менен байланышта болгон

Бүгүн, 30-мартта өкмөт үйүндө өткөн онлайн жыйын учурунда Нарында коронавирус аныкталган жаран тууралуу маалымат айтылды. Анда саламаттыкты сактоо министри Космосбек Чолпонбаев коронавирус жуктуруп алган Нарын шаарынын тургуну эмне үчүн обсервацияга алынбаганын айтты.

“Нарында коронавирус менен жабыркаган жаран аэропорттон текшерилген. Үй карантинине жиберип, нускама менен үйүнө жөнөтүлгөн. Ал чет өлкөдөн келген учурда 14 күндүк алгоритм башкача болгондуктан, ага кирген эмес”, - деди министр Чолпонбаев.

Айтымында, карантинге кетип жаткан жаран эч ким менен байланышта болбошу керек болчу.

Ал эми биринчи-вице-премьер-министр Кубатбек Боронов вируска чалдыккан жаран 150дөн ашык адам менен байланышта болгонун кошумчалады. "Бейтап текшерилгенден кийин нускамага кол коюлуп, үй карантинине жиберилген. Анда 14 күн бою эч ким менен байланышпай турушу керектиги көрсөтүлгөн. Бирок шаар тургуну 154 киши менен байланышып, карантиндин эрежелерин сактаган эмес. Бул анын жарандык жоопкерчилиги", - деди ал.