Конокко барууга болбойт, өспүрүмдөр жалгыз көчөгө чыга албайт. Өзгөчө абал режимине дагы жаңы эрежелер киргизилди?

Бүгүн, 31-март күнү Өкмөт үйүндө ички иштер министринин орун басары, Бишкек шаарынын коменданты Алмазбек Орозалиев өзгөчө абал режиминин жыйынтыгы боюнча маалымат берди.

"Бүгүнкү күндө Бишкек шаарына киргизилген өзгөчө абал режимине карабай, өзүн жана айланасындагыларга коркунуч жаратып, көчөгө чыккан жарандар көп болуп жатат.

Ошого байланыштуу өзгөчө абал режимине кошумча эрежелерди киргизүү тууралуу буйрукка кол коюлду. Буйруктагы айрым эрежелерге токтотоло кетейин:

* Зарыл жумушу жок жеке унаасы менен көчөгө чыгууга;

* Кошуна-колоң, кесиптеш, туугандар менен жолугушууга;

* Үчтөн ашык адамдын чогулуусуна;

* Өспүрүмдөр улуулардын коштоосу жок көчөгө чыгууга тыюу салынат!

Ошондой эле шаардын жашоо ишмердүүлүгүн камсыз кылгандардан тышкары, бардык уюмдар менен ишканалар ишин убактылуу токтотсун", - дейт Орозалиев.