"Шарты жок имаратты обсервация кылганы жатышат". Ысык-Көлдүктөр нааразычылык акциясына чыгышты

Ысык-Көл облусунун Түп районундагы Ысык-Көл айылынын тургундары нааразычылык акциясына чыгышты. Алар Маяк деген саламаттыкты сактоо жана билим берүү борборуна обсервация уюштурулушуна каршы чыгып жатышат. Бул тууралуу жергиликтүү тургун Максат Жаныбеков билдирип, элдин каршылык акциясына чыгуу себебин төмөнкүчө түшүндүрүп берди.

"Бул жакка обсервацияга деп адамдарды алып келип жатышат. Обсервация кылууга бизде эч кандай шарт жок, имарат эски, терезелери ачык, даараткана жок. Чынында эгер бардык шарттар болгондо эл каршы болбойт эле. Бирок алар коомдук талаптарга жооп бере турган, талаптагы ыңгайлуулуктарды түзбөй жатышат.

Бул биринчи учур эмес, мындан 5 жыл мурун бул жакка өпкө оорусу менен ооругандарды алып келишкен. Анда дагы шарт түзөбүз деп айтышып, бирок андан бери канча убакыт өтсө дагы эч кандай шарт түзүшкөн жок. Ошондон кийин биздин айылдагы көп жашоочулар өпкө оорусу менен ооруп башташты. Мындан улам биз каршы чыгууга аргасыз болуп жатабыз. Шарт түзүүнү талап кылган элди милиция кармап кетип жатат. Азыркы тапта 3 жаран камакта", - деп билдирди Жаныбеков.

Кечээ, 31-мартта Ысык-Көл облусунан 2 адамдын коронавирус жуктурганы маалым болгон.