"Карантинге чейин үйдө жегенге эч нерсебиз калбай калган". 6 баланы жалгыз асырап жаткан эненин көйгөйү

6 баланын апасы Эркинай айым эч жерде иштебейт. Эмчек эмген эгиз балдарым бар деген көп балалуу эне тамак-аштын тартыштыгынан карды ач болуп, кан басымы түшүп кеткен учурлар болгонун айтат. Учурда Эркинай айым Кемин районуна караштуу Чым-Коргон айылында жашайт. Жашап жаткан үйгө 2019-жылдын сентябрь айында көчүп келген. Үй арабдардын кайрымдуулук фонду тарабынан жардамга муктаждар үчүн салынган.

"Жолдошум экөөбүздүн турмушубуз бир болбой, эки жолго түшкөнбүз. Балдарыма ушул жылдын январь айынан баштап жөлөк пул алып баштадым, ал дагы жеке фонд тарабынан каржыланат. Мамлекет жактан эч кандай жеңилдик же жардам деле жок. Ал акчага тамак-аш алабыз, башка нерсеге артпай калат. Мисалы 2 айдан бери электр жарыгы үчүн, сентябрдан бери балдарымдын мектебине ай сайын (кароолчуга, тамак-ашка) берилүүчү акчаларды төлөй алган жокмун. Мектептен төлөп койгула дейт, кайра-кайра айттырбай төлөп коёюн десем каражат жок.

Карантин баштала электе 45 килограмм ун, кесме, суу май жана самын сыяктуу жуунуучу каражаттар арабдардын фонду тарабынан берилген. Ишенсеңер ал жардам берилгенге чейин үйдө жегенге эч нерсебиз калбай калган болчу. Тамак-аштын жетишсиздигинен кардым ачып, кан басымым түшүп кеткен учурлар болду. Эгиз балдарым бар, эмизем. Колубузга тийген жардамды алып, шүгүр деп отурабыз. Мындан ары карантин уланса тамак-ашыбыз кандай болот?

3 балам мектепте окуйт. 4-чейректе онлайн окутуу болот, болгону бир телефон бар. Интернетке дагы дайыма кошулбай калат. Бир телефонду үчөө күтүп турушат, кайсы баламдын колуна карматып, окуусун улантмак элем. Көп сабактары калып калат", - дейт ал.

Эмгек жана социалдык өнүктүрүү министрлигинин маалыматына ылайык, республика боюнча тизмеде катталган аз камсыз болгон үй-бүлөлөрдүн саны 96 миң, алар азык-түлүк жардамына муктаж. Өзгөчө кырдаалга байланыштуу көптөгөн адамдар жумушсуз калды. Бүгүнкү күндө жардамды бардык үй-бүлөлөр ала элек. Алардын катарында көп балалуу, жалгыз бой энелер дагы бар.

Эркинай айымга жардам берүүнү каалагандар 0(554) 126-020 (ЭЛСОМ) номери аркылуу байланышса болот.