Аида Исмаилова вице-премьер-министр болуп дайындалды (өмүр баяны)

Аида Исмаилова вице-премьер-министр болуп дайындалды. Бул тууралуу президенттик аппараттын басма сөз кызматынан билдиришти.

Маалыматка ылайык, тийиштүү жарлыкка президент Сооронбай Жээнбеков кол койду.

Буга чейин бул кызматты Алтынай Өмүрбекова аркалаган. Бүгүн, 1-апрелде Жогорку Кеңеш вице-премьер-министр кызматына Аида Исмаилованы шайлады.

Аида Исмаилова 1976-жылдын 17-декабрында Фрунзе шаарында төрөлгөн. Ал 1999-жылы Бишкек гуманитардык университетинин чыгыш таануу факультетинен экономист-чыгыш таанучу кесибине ээ болгон. Эмгек жолун 1997-жылы, студенттик кезден баштаган.

"Баласагын" жеке менчик мектебинде корей тилинен мугалим болуп эмгектенген;

1998-2002-жылдары "Пхурыл Киль" ЖЧКсында котормочу;

2002-2005-жылдары "Хануль" ЖЧКсында негизги менеджер, котормочу;

2005-2006-жылдары "Венчур Си энд Си Плаза" компаниясында котормочу;

2006-2008-жылдары "Венчур Си энд Си Плаза" компаниясында негизги менеджер – котормочу;

2006-2010-жылдары кореялык PARK8 OPC Компаниясынын Кыргыз мамлекетиндеги жергиликтүү өкүлү;

2011-2015-жылдары "Silk road services" ЖЧКсынын генералдык директору;

2015-жылы "Республика-Ата Журт" партиясынын тизмеси менен Жогорку Кеңештин VI чакырылышынын депутаты болуп шайланган.