Пакистанда даваатта жүргөн 3 Кыргыз жараны коронавирус жуктурду, алардын улуусу 70 жашта

Пакистандын Абботтабад шаарында 3 Кыргыз жараны коронавирус жуктурганы аныкталды. Бул тууралуу республикалык штабдан билдиришти.

"Пакистанда даваатта жүргөн 61, 68 жана 70 жаштагы 3 Кыргыз жараны коронавирус жуктурган. Алдын ала маалыматка ылайык, бул жарандар башка 6 Кыргыз жараны, ошондой эле бир Орус жараны менен кошо Хайбер-Пахтунхва провинциясынын Абботтабад шаарында даваат кылып жүрүшкөн. Азыркы учурда ооругандардын бирөөсү ооруканага жаткырылды, анын жанында үй-бүлөсүнүн мүчөсү бар (аларда да коронавирус аныкталган). Үчүнчү жаран карантиндик аймакта дарыгерлердин көзөмөлүндө. Бардыгынын абалы туруктуу деп бааланууда.

Жогоруда көрсөтүлгөн жарандар Кыргыз өлкөсүнүн Исламабаддагы элчилигинде консулдук каттоого турган эмес, мекемеге жардам сурап өз алдынча кайрылган эмес. Элчилик Пакистандын медицина мекемелери, ошондой эле укук коргоо органдары менен дайыма байланышып турууда", - деп жазылат маалыматта.