Дүйнөлүк банк коронавируска каршы күрөшүү үчүн Кыргыз өлкөсүнө 12 миллиондон ашуун доллар бөлдү

Кечээ, 2-апрелде Дүйнөлүк банктын директорлор кеңеши Кыргыз өлкөсүнүн COVID-19 пандемиясы менен күрөшүүсүнө Эл аралык Өнүктүрүү Ассоциациясы (IDA) тарабынан 12 миллиондон ашуун доллар бөлүп бере турганын жарыялады. Бул тууралуу Дүйнөлүк банктын Кыргыз өлкөсүндөгү өкүлчүлүгүнүн билдирүүсүндө айтылат.

"COVID-19 өзгөчө кырдаалдарга жооп берүү долбоорунун максаты - адамдардын өмүрүн сактап калуу жана андан аркы инфекциянын жайылуусун алдын алуу. Тиешелүү профилактикалык иш-чараларды көрүп, зарыл дары-дармектерди, каражаттарды жана жабдууларды сатып алуу, медициналык кызматкерлер үчүн жана бейтаптарды дарылоо үчүн коркунучтарды азайтуу негизги максат болуп саналат", - дейт Дүйнөлүк банктын Кыргыз өлкөсүндөгү кеңсесинин башчысы Болормаа Амгаабазар.

Аталган акча каражатына зарыл болгон каражаттар, анын ичинде аныктоочу комплекттер, лабораториялык реагенттер жана медицина кызматкерлери үчүн жеке коргонуу каражаттары сатып алынат. Борбор калаадагы жана өлкөнүн жети облусундагы ыкчам жооп кайтаруучу топтор унаалар менен камсыз болушат. Медициналык топ COVID-19 вирусу бар бейтаптарга кам көрүү жана инфекциялардын алдын алуу боюнча окутуудан өтүшөт. Өзгөчө кырдаалдарда потенциалды арттыруу боюнча узак мөөнөттүү иш-чаралар башка өнөктөштөр, анын ичинде Дүйнөлүк Саламаттыкты сактоо уюму аркылуу жүргүзүлөт.

"Долбоордун алкагында сегиз керебеттүү он реанимация бөлүмү атайын дайындалган ооруканаларда түзүлөт же толук жабдылган вентилятор, дефибриллятор, мобилдик рентген аппараттары, кычкылтек концентраторлору жана башка керектүү шаймандар сатып алынат. Бейтаптардын жана кызматкерлердин коопсуздугун камсыз кылуу үчүн реанимациялык дагы 20 бөлүм, республикадагы 24 оорукананын 100 изолятору тез арада оңдолот.

Мындан тышкары 9 миллион доллар "Учурдагы Кыргыз өлкөсүндөгү табигый кырсыктарга туруштук берүүнү жакшыртуу" долбоорунан кайра бөлүштүрүлөт. Дүйнөлүк банк каржылаган долбоор өкмөттүн өзгөчө кырдаалдарда пайдаланылбаган каражаттарды тез арада алууга мүмкүнчүлүк берүүчү механизмди камсыз кылат", - деп айтылат маалыматта.