Италияда дарыгер кызды жигити "мага коронавирус жуктурат" деп коркуп, өлтүрүп койду

Италиянын административдик облусу болгон Сицилиянын Мессина шаарында 28 жаштагы Антонио Де Паче аттуу жашоочу сүйлөшкөн кызын муунтуп өлтүрдү. Окуя тууралуу чет элдик маалымат булактары жазышууда. Ага ылайык, Антонио Де Паче өзү да медицина кызматкери.

Сүйлөшкөн кызы Лорена Каранта 27 жашта болгон, ал дарыгер, абалга байланыштуу коронавирус менен күрөшүп иштеп жаткан. Жигити экөө бир ооруканада чогуу иштешкен.

"Антонио Де Паче өзү полицияга чалып чакырып, кылмышы тууралуу айткан. Полиция окуя болгон жерден муунтулуп өлтүрүлгөн кыздын денесин жана жабыркап жаткан жигитти көрүшкөн. Антонио Де Паче кызды өлтүргөндөн кийин өзүн-өзү өлтүрүүгө аракет кылган. Аны шашылыш түрдө ооруканага жеткиришип, эсине келген. Андан кийин CoViD-19 инфекциясынан коркуп ушул ишке барганын айтып берген", - деп жазылат маалыматта. Ал сүйлөшкөн кызынан бул оору ага жугуп калышы мүмкүн деп чочулаган.

Лорена Каранта квалификациялуу дарыгер, жигити медмырза болуп иштешкен. Экөө тең коронавируска карата тест тапшырып, экөөнөн тең илдет табылган эмес. Экөө тең социалдык тармактардын активдүү колдонуучулары, өзгөчө Лорена Каранта жумушуна жоопкерчиликтүү мамиле жасай турганын, Италиядагы абал, медицина кызматкерлеринин бул учурдагы кызматы тууралуу ойлорун жазып турган.

Пандемияга байланыштуу дүйнөнүн көп бөлүгүндө адамдар дүрбөлөңгө түшүп жатышат. Өзгөчө көп күч медицина кызматкерлерине жүктөлдү деп жазылат маалыматта.