"Пакистанга даваатка кеткен атамдан дайын жок". Баткенде 4 жаран декабрь айында төрт айга даваатка кетишкен

"Айылыбыздан 4 киши Пакистанга 4 айга даваатка кеткен. Алар апрелдин биринде келмек. Бирок карантинге карата жол жабылып калып, келе албай жатышат", - деген жаран SUPER.KG порталына кайрылды.

"Баткен облусунун Кадамжай районундагы Бирлик айыл өкмөтүнөн төрт киши 2019-жылдын 5-декабрында Бишкектен Өзбекстан аркылуу Пакистанга кетишкен. Алардын арасында 62 жаштагы атам дагы бар. Ал учурда коронавирус деген оору чыга элек болчу. Эми байланышалы десек жанында телефондору жок. 30-март күнү атам WhatsApp аркылуу апам менен байланышыптыр. Атамдын айтымында, ал жакта кыргыздар көп экен. Ал 5-6 күндө кыргыз тарап учак жөнөтөт деп айткан экен. Апам Пакистандын кайсыл жагында жүрөсүңөр десе "Биз алыскы айылында мечитте жашап жатканбыз. Бирок коронавирус боюнча эч кандай маалыматыбыз жок болчу. Анан эле айылдагылар бизди бул жактан кете бергиле деди. Азыр биз Пакистандын борборуна бара жатабыз" деген экен атам. Ошол боюнча бизде алар тууралуу башка маалымат жок болуп жатат.

Сиздер Пакистанда кармалган кыргыздар боюнча маалымат жазганда аты-жөндөрүн жок дегенде кыскартып жазууңуздарды суранабыз. Балким биздин атабыздын дайыны чыгып калат. Кыжалат болуп турабыз", - дейт ал.

Буга чейин Пакистандын Абботтабад шаарында 3 Кыргыз жараны коронавирус жуктурганы аныкталган.