Коронавирус менен ооруган орусиялык актриса карантинди бузуп, көчөгө чыгып кеткен. Аны кандай жаза күтөт?

Коронавирус жуктурган орусиялык актриса Янина Бугрова үй карантинин бузуп, көчөгө чыгып кеткен. Бул тууралуу орус басылмалары жазып чыгышты.

"Бирге бактылуубуз" ("Счастливы вместе") комедиялык телесериалына тартылган 43 жаштагы актриса Франциядан келгенине байланыштуу коронавируска тест тапшырган. Тесттен вирус аныкталып, бирок жеңил түрү болгондуктан дарыгерлер ооруканага жаткырбай, үй карантинине чыгарышкан. 3-апрель күнү актрисадан кабар алуу үчүн келген "Тез жардам" бригадасы аны үйүнөн таппай калып, 11 чакырым алыстыкта жүргөнүн билишкен. Медицина кызматкерлери дароо полицияга кайрылышкан. Укук коргоочулар Бугрованын социалдык тармакка жүктөгөн сүрөттөрүнөн бир нече ирет карантинди бузгандыгын аныкташкан.

Эске салсак, Орусиянын президенти Владимир Путин 1-апрелден тартып карантинди бузган жарандарга айып киргизүү тууралуу буйрукка кол койгон. Буйрукка ылайык, эгер жаран карантинди бузуп, адамдардын массалык түрдө вирус менен оорусуна алып келсе, анда 500-700 миң рубль айыпка жыгылат же 2 жылга чейин жазага тартылат.