Наристеге жиберилген азык-түлүк көрсөтүлгөн дарекке жеткен эмес. Милиция кызматкерлери шектүү делинген курьерди кармашты

3-апрелде жалгыз бой эне социалдык тармак аркылуу курьерге алданганын айтып, жазып чыкты. 31-мартта келиндин мурунку күйөөсү курьер аркылуу наристеге азык-түлүк, жалаяк берип жиберген. Бирок жиберилген азык-түлүк көрсөтүлгөн дарекке жеткен эмес.

Социалдык тармакта жарыяланган постто аял карантинге байланыштуу эч жерде иштебей тургандыгын айткан. Келин интернет ​​аркылуу курьерге кайрылып, азык-түлүктү алып келип берүүсүн өтүнгөн. Анын билдирүүсүндө ошол эле күнү окуяга байланыштуу милицияга кайрылганын да кошумчалаган.

Бишкек шаардык коменданты билдиргендей, 31-мартта жабырлануучу арыз жазган. Маалыматка ылайык, жабырлануучунун күйөөсү ошол күнү кечки саат бештер чамасында Чапаев көчөсүндөгү дүкөндүн жанынан Хундай Соната үлгүсүндөгү унаанын эсинен баласына азык-түлүк жиберген. Ал 2 миң 510 сомго алынган азык-түлүктү көрсөтүлгөн дарекке жеткирип берүүнү суранып, тейлөө акысын да төлөгөн. Курьер буйрутманы алгандан кийин, байланышты үзгөн.

Бул факты Кылмыштардын жана жоруктардын бирдиктүү реестрине "алдамчылык" беренеси менен катталган.

3-апрелде Бишкек шаардык ички иштер башкы башкармалыгынын криминалдык милиция кызматынын ыкчам кызматкерлери курьерди кармашты. Ал 1990-жылы туулган С.Р. аттуу жаран экени аныкталды.

Кылмышка шектүү сурак учурунда телефон номерин туура эмес жазганын, көрсөтүлгөн даректи таба албагандыгын жана үч күндөн бери издеп жүргөнүн айтып берген.

"Мен айдаган унаа дагы өзүмдүкү эмес, ижарага алып айдайм. Ооба, ал күнү мени жолдон бир жигит тосуп, баласына азык-түлүк берип жиберген. Андагы номер туура эмес жазылып калып, үч күн издеп жүрдүм. Кантсе дагы кечирим сурайм", - деп көрсөтмө берген шектүү жаран.