5G технологиясы жөнүндө мессенжерлерге тараган аудио чындыкка дал келбейт

"5G технологиясы Кыргыз өлкөсүнө келип, айлана-чөйрөгө жана адамдарга олуттуу зыян берет экен" деп мессенжер, социалдык тармактар ​​аркылуу таратылып жаткан аудиодогу маалымат чындыкка коошпойт. Бул тууралуу бүгүн, 4-апрелде Маалыматтык технологиялар жана байланыш мамлекеттик комитетинин басма сөз кызматынан кабарлашты.

"Дүйнөнү дүрбөткөн коронавирус пандемиясын себеп кылып, адамдардын коркуу сезимин күчөтүп, жасалма маалымат таратып жатышат. Анын ичинде заманбап 5G технологиясынын коркунучтуу экенин айткан үрөй учурган билдирүүлөр бар. Бирок бул билдирүүдө айтылгандар чын эмес", - деп айтылат маалыматта.

Кыргыз Республикасынын санитардык-эпидемиологиялык кызматынын адистери жана аккредитацияланган лабораториялар базалык станциялардын радиациялык деңгээлин өлчөөнү бир нече жолу жүргүзүшкөн. Изилдөөлөрдүн жыйынтыгы боюнча, байланыш жабдыктарынын иштеши бардык санитардык нормаларга жооп бере турганы аныкталган.

5G технологиясын киргизүү боюнча комитет Кыргыз өлкөсүнө 5G түйүндөрүн киргизүү жана жайылтуу 2020-жылдын башында карала баштагандыгын билдирген.

Мамлекеттик байланыш агенттиги, ыйгарым укуктуу органдар жана уюлдук операторлор биргеликте радио жыштыктарды бөлүштүрүү боюнча иштерди тыкыр жүргүзүүдө.

Учурда 5G технологиясын сыноо маселелери чечилүүдө.

5G технологиясын сыноо үчүн радио жыштык тилкелери аныкталгандан кийин, пилоттук зоналарды түзүү үчүн керектүү компоненттерди жеткирүү, убакытын аныктоо үчүн жабдууларды өндүрүүчүлөр менен сүйлөшүүлөр башталат. Мындай учурда пилоттук зоналар багытта жана имараттын ичинде гана уюштурулушу керек. Бул пилоттук зоналарда, сыноо учурунда санитардык-эпидемиологиялык кызматтар стандарттардын сакталышын жана алардын адам организмине жана айлана-чөйрөгө тийгизген таасирин аныктоо үчүн радиацияны өлчөө жүргүзөт.

Маалыматтык технологиялар жана байланыш мамлекеттик комитетинин маалыматында, бүгүнкү күндө 5G технологиясы Кыргыз өлкөсүнө кире элек.