Ош облусу боюнча коменданттык сааттын талаптарын бузган 92 жаран кармалды (хронология)

"Социалдык тармакта ар ким кеңештерин берип жатат. Биз бир гана медицина кызматкерлеринин кеңешин угушубуз керек. Айрымдарды медициналык билими жок кеңеш бербөөгө чакырам", - дейт комендант.

Сарыбашов Ош шаарынын мэриясы тарабынан медицина кызматкерлерине 5 тонна ун таратылганын айтты. "Аларга 28 автоунаа бекитип берилген. Ал эми укук коргоо органдарына 5 автобус каралган. Мындан сырткары Ош шаарына 2 600 кап ун гуманитардык жардам катары келген. Аларды аз камсыз болгон 605 үй-бүлөгө жана ден соолугунун мүмкүнчүлүгү чектелген 395 адамга таратылып берилди. Ал эми жардам берүүнүн экинчи этабында 80 тонна ун чындап жардамга муктаж үй-бүлөлөргө таратылат", - деди ал.

Ош шаарынын комендантына мас абалында кармалган судья тууралуу суроо берилди.

"Бүгүнкү күндө ал мыйзам алдында жоопко тартылат, кармалганда эле протокол тузүлүп, 17 миң сом айып салынган. Бул тууралуу маалыматты судьялар комиссиясына жөнөтөбүз", - дейт ал.

"Атайын укук органдары менен биргеликте иш алып барып жатабыз. Бүгүнкү күндө 1 300 сомдон ундарды тараттык.100 тоннадан ашык ун запаста турат. Казакстан аркылуу 900 тонна буудай келип жатат. Ун боюнча кооптоно турган нерсе жок. Азык-түлүктүн запасы жетиштүү", - дейт мэр.

Нурдинов билдиргендей, мас абалында унаа башкарып бара жаткан 2 жаранга 3 000 сомдон жана 17 500 сомдон айып пулдар салынды. "Учурда коомдук саясий абал туруктуу, комендатуранын көзөмөлүндө", - деди ал.

"Ички иштер органынын кызматкерлерине шарт түзүлгөн. Ош облусу боюнча ички иштер органынын кызматкерлеринин ичинде коронавирус жуктургандар жок", - дейт Ош шаарынын коменданты.

Малик Нурдинов 8-апрелге караган түнү Ош облусу боюнча текшерүү иштеринин жүрүшүндө коменданттык сааттын эрежелерин бузган 92 адам кармалганын айтты.