АКШнын Олтон шаарынын мэри карантинди бузгандарды жазага тартууну буюрган. Эртеси анын жубайы тартип бузуп кармалган

Американын Иллинойс штатындагы Олтон шаарынын мэри коронавирус пандемиясынан улам карантинди бузган жарандарды жазага тартуу буйругун берген. Эртеси мэрдин жубайы тартип бузуп кармалган. Бул тууралуу чет элдик басылмалар жазып чыгышты.

АКШнын Олтон шаарынын мэри Брэнт Уокер карантинди бузган жашоочуларды жазага тартууну чечкен. Ал полиция кызматкерлерине жума жана ишемби күнү кечинде шаардагы бардык бар, клубдарды текшерип, тартип бузгандарды аныктоо тууралуу буйрук берген. Кызыгы, эртеси күнү кечинде барлардын биринен полиция мэрдин жубайын кармаган. Бул тууралуу Уокер Фейсбук баракчасына жазып чыккан.

«Мен полициянын башчысына жубайыма карантинди бузган башка адамдардай мамиле кылуусун айттым. Ал эч кандай артыкчылыкка ээ болбойт. Менин жубайым бойго жеткен адам, ал өзү чечим кабыл алат. Бул кырдаалда ал жоопкерчиликсиздигин көрсөттү. Эми ал башка тартип бузгандар сыяктуу эле кылган ишинин кесепетин көрөт. Бул окуя үчүн уялып жатам жана Олтон шаарынын жашоочуларынан кечирим сурайм", - деген мэр.

Маалыматка ылайык, Иллинойс штатында бир үй-бүлөдөн ашык адамдардын чогулуусуна тыюу салынган. Тартипти бузгандар, алардын арасында эми мэрдин жубайын да 2500 доллар айып пул төлөө же 364 күндүк камак күтүп турат.