Чет элдик ЖМКлар Австралияда коронавирустун жугушун чектей алган препарат иштелип чыгып жатканын жазышууда

Тектеш кабарлар: Дүйнөгө тараган коронавирус боюнча башка маалыматтар (8923 материал)

Коронавирус менен күрөшүп, анын адам организминде көбөйүшүнө бөгөт коё алат делген дары иштелип чыгууда. Бул тууралуу Австралиянын окумуштууларынын жүргүзгөн изилдөөлөрүнө таянып, чет элдик басылмалар жазышууда.

Анда жазылгандай, коронавируска каршы иштелип чыгып жаткан жаңы препарат организмдеги коронавирустун жайылышын 48 сааттын ичинде басаңдатат. "Ивермектин" деп аталган дарынын эффективдүүлүгү 93 пайызды көрсөткөн.

"Учурда Австралиянын окумуштуулары лабораториялык изилдөөлөрүн жүргүзүп жатышат. Тажрыйба лабораториялык шартта коронавирус менен жабыркаган клеткага жасалган. Алар жаңы препарат жакшы жыйынтыктарды көрсөткөнүн белгилешкен. Анткени эксперимент маалында препарат үлгүлөргө терс таасирин берген эмес. Изилдөөнүн жыйынтыгы "Antiviral Research" (вирусология жана дары-дармектерди изилдөө боюнча популярдуу журнал) илимий журналына жарыяланган. Изилдөөнү Австралиядагы Монаш университетинин окумуштуулары жүргүзгөн", - деп жазылат маалыматта.

Дарыны иштеп чыккандар препарат вирустун бир адамдан экинчи адамга жугузуп алуу коркунучун чектей тургандыгын да белгилеп өтүшкөн.

Маалым болгондой, 9-апрелге карата дүйнө жүзүндө коронавирус менен жабыркагандардын саны 1 миллион 511 миң 104 болду. Айыккандардын саны - 329 миң 329, каза болгондор - 88 миң 338.

Эскертүү! коронавируска каршы вакцина иштелип чыга элек. Ал эми COVID-19 илдетин дарылоодо колдонуп жаткан дары-дармектерди дарыгердин көрсөтмөсү жок колдонууга болбойт.