"Үйдө 10 килограмм унум бар, мага берчү унду муктаждарга бергиле". Жашы 70ке чукулдап калган апа кайрымдуулуктан баш тарткан

Куудул жана тамада Эрнист Бөрүбаев өлкөдөгү азыркы кырдаалга байланыштуу азык-түлүккө муктаж адамдарга жардам берүүдө. Ал таратып жүргөн азык-түлүктөн баш тарткан улгайган апа тууралуу кыскача видеосун социалдык тармактагы баракчасына жүктөгөн. Бул видео кызуу талкууга алынып, көпчүлүк колдонуучулар "ушундай адамдарыбыз көп болсун" деп, апага ыраазычылыгын билдиришүүдө.

Бул тууралуу Эрнист Бөрүбаевге байланышканыбызда, видео Ак-Ордо конушунда тартылганын айтты.

"Мен жардам бергендеримдин эч кимисинин атын сурабайм, бетин дагы видеого дагы тартпайм. Бул апанын атын сураган жокмун. Жашы 70ке чукулдап калган апа экен. Мен апага күнүмдүк тамак-ашка керектүү бир аптага жете турган азык-түлүктөрдү алып баргам. Алып барсам, "балам башкаларын алайын, бул унуңду башка муктаж адамдарга алып барып бер. Менде 10 килограмм унум бар. Ал түгөнгүчө пенсиям дагы тийип калат" деп айтты. Биз ыраазы болдук. Кээ бирөөлөр үйүбүздө эч нерсе калбай калды деп алдап чакырып жатышат", - деп билдирди ал.