"Арак ичпейм, намаз окуйм". Ошто кесиптештери тарабынан айыпталып жаткан башкы дарыгер үн катты

8-апрелде Оштогу балдардын инфекциялык ооруканасындагы дарыгерлер байланышка чыгып, бийликке кат жолдошкон. Анда алар "Бизге жалаа жабышпасын, ажы тойго эч ким барган эмес. Ажы тойго шылташпасын, бул жерде ич ара вирус жугуу болгон", - деп бийлик өкүлдөрүнө билдирүү жазышкан.

Ал эми кечээ, 9-апрелде жалаага кабылдым деген дарыгердин жеке каты жарыяланган. Анда дарыгер абалы оор экенин айтып, каттагы маалымат коомчулукка жетүүсүн өтүнгөн. Көп өтпөй SUPER.KG порталы вирус жуктуруп, бейтапканада жаткан дарыгер менен байланышып, анын абалын билип, кээ бир маалыматтарды алган.

Жогорудагы үч маалыматта тең Ош шаардык балдар инфекциялык ооруканасынын башкы дарыгери Кайрат Абжаловдун аты аталып, аны окуяга кайдыгер карап, маалыматты туура эмес жеткирген деп дарыгерлер айыпташкан.

Бүгүн, 10-апрелде Абжалов ага коюлган айыптар негизсиз экенин, бирок актанууга да акысы жок экенин SUPER.KG порталына айтып берди. Айтымында, ал алкоголдук ичимдик ичпейт жана өз жумушун так инструкциянын негизинде аткарып келген.

"Биринчиден, мен намаз окуган мусулман адаммын. Экинчиден, ал учурда жумушка убагында келип, штабга чакырганда убагында барып жаткам. Анткени өлкөдөгү кырдаалга байланыштуу штаб мүчөсүмүн. Ошол күндөрү көрүп жаттыңар обсервация жасап, орундуктарды бошотуп жаттык. Ал күндөрү киши көп болуп, убактымдын көбүн ошол жакка жумшап жаттым. Жумушка келип, отчёт алып, буйрукту жеткирип, көзөмөлдөп турдум. Мен ичип, жумушума кайдыгер мамиле жасаган адам эмесмин, үч балам бар. Ал эми кошунасыныкына чай ичип барып, вирус жуктурган деген мурун эле айтылып жаткан маалымат. Каяктан, эмне болуп жугуп калганы боюнча изилдөө жүрүп жаткан. Бул тууралуу азыр да эч нерсе айтпайм. Бул иш учурда тыкыр текшерилип жатат.

Маселеге байланыштуу Бишкек шаарынан чоң комиссия келе жатат. Булардын баарын эпидемиологдор көрүп, изилдеп, анализдеп анан жыйынтык чыгарышат. Ооба, кошунасына кирип чай ичкен эмес, обсервацияга кирген, мүчүлүштүктөр болгон деген сөздөр болуп жатат. Жеке мен моралдык укугума жооп берем. Албетте, кесиптештерим сакайсын, мен аларга ден соолук каалайм. Кийин жакшы болушканда деле көрүшчү күн келет. Азыркы тапта бүт маалымат каражаттары аркылуу мени каралоо иштери жүрүп жатат. Баары алардын сөзү боюнча чагылдырып жатышат.

Ооба, алар ооруп жаткан адамдар. Мен кесиптештеримди жамандап актана албайм, азыркы тапта бул туура эмес. Анткени адаммын, макул айта беришсин. Ал эми вирусту кимден жуктурганы боюнча адистер тактап, жыйынтык чыгарышат. Кесиптештериме таарынып капа деле болбойм, Кудай бар да. Мен дагы бир ирет тастыктап, арак ичпегенимди, өз жумушумду так, инструкциянын негизинде аткарып келгенимди айтып койгум келет", - деди Кайрат Абжалов.