Карантин учурунда көчөгө "чуркаганы" чыккан чолок шымчан кыздын видеосу талкууга түштү

Социалдык тармакка милициянын патрулдук кызматкерлери тарабынан кармалган кыздын видеосу тарады. Анда кыздын жанында аты-жөнүн тактаган документи жок болгондуктан, милиция кызматкерлери алар менен Свердлов РИИБине баруусун суранган. Өзүн Каныкей деп атаган кыз эч жакка бара турган ою жоктугун жана кызматкерлер аны себепсиз кармап жатышканын билдирген. Бишкек шаарына киргизилген өзгөчө абал режиминде документи, бетинде медициналык бет кабы жок көчөдө жүрүүгө болбой тургандыгын эскерткен кызматкерлерге кыз "Мен чуркаганы чыккам" деген жооп кайтарган. Аталган видео социалдык тармактарга тез тарап, кыздын жоругу катуу сынга алынды. Айрымдар анын сүрөтүн мем кылып таратууга да жетишти.

Окуя боюнча Бишкек шаардык комендатурасынын басма сөз кызматынан төмөнкүдөй маалымат беришти.

"Аталган окуя кечээ, 9-апрель күнү саат 16:55те катталган. Ал жаран Свердлов РИИБине алып келинип, аты-жөнү аныкталды. 1999-жылы туулган Ч.К.га өзгөчө абал режими тууралуу профилактикалык түшүндүрүү иштери жүргүзүлүп, үйүнө коё берилди", - деп билдиришти басма сөз кызматынан.